"Matanë s’ka harrim" e Vjollcë Berishës tani edhe si eBook

"Matanë s’ka harrim" u botua për herë të parë në vitin 2021 nga shtëpia botuese SYTH në Tetovë. Tani, përmes një projekti të OpenLine Books, përmbledhja vjen edhe si libër elektronik. Së shpejti do të botohet edhe në gjermanisht.

Të jetosh me praninë e mungesës

Në "Matanë s’ka harrim", Vjollcë Berisha shkruan për dashurinë që vazhdon të jetojë edhe pasi dy njerëz janë ndarë. Mungesa ndihet në trup, zë vend në dhomë, ndryshon pamjen e rrugëve dhe ritmin e ditëve. Një derë e pambyllur, një kafe mëngjesi apo një shtrat i zbrazët marrin peshën e një historie të tërë. Kujtesa rikthen prekjet dhe bisedat, por edhe heshtjet, ngurrimet e çastet kur krenaria ka qenë më e fortë se dëshira për t’u afruar.

Me gjuhë të drejtpërdrejtë dhe figura të guximshme, poetja i jep zë një gruaje që e pohon dëshirën e vet dhe përballet me frikën, xhelozinë e vetminë. Ajo kërkon të dashurojë lirshëm, zemërohet, dyshon dhe e kap veten duke besuar atë që do të donte të ishte e vërtetë. Kjo vetëdije u jep poezive sinqeritet dhe i afron me përvojën e lexuesit.

Një nga veçantitë e këtij libri është mënyra si sendet e zakonshme bëhen pjesë e jetës së brendshme. Çelësat, valixhet, syzet mbi komodinë dhe dritat e rrugëve ruajnë gjurmët e afërsisë së dikurshme. Përmes tyre, ndarja bëhet e prekshme. Butësia ndërthuret me revoltën, ndërsa ironia e hollë e pengon dhimbjen të kthehet në vajtim të njëtrajtshëm.

Nga njëra poezi te tjetra, ndërtohet historia e një lidhjeje që vazhdon në kujtesë, edhe kur kthimi duket i pamundur. Titulli "Matanë s’ka harrim" merr kështu kuptimin e vet në gjithë librin: njeriu mund të largohet nga një dashuri, por ajo mbetet pjesë e mënyrës si e sheh dhe e përjeton botën.

Muhamet Ajeti

Porositja e librit

Libri elektronik shpërndahet në platformat kryesore ndërkombëtare të librave. Për ta porositur më lehtë, klikoni te lidhja më poshtë.